中環出更：「容易腳傷的男人」 陳家偉9年3歷手術
舊年年底選出嘅中華廠商聯合會（廠商會）新班子喺今日，即係元旦日正式上場。早前喺廠商會嘅晚宴上，新任會長吳宏斌、新丁副會長黃家和、盧金榮同吳國安等人齊集，仲見到常董陳家偉（Calvin）撐住兩支拐杖現身。細問之下，原來Calvin打網球整親半月板，啱啱做完手術，佢仲自爆九年嚟對腳已經做咗三次手術，十足係「容易受傷的男人」。
Calvin解釋，話當年第一次受傷係踢波時整斷韌帶，隔咗一年後就整親半月板，新傷加舊患嘅情況下，今次又再整親另一隻腳嘅半月板，講起都感到無奈。為咗減輕對腳嘅壓力，佢話日後要控制好體重先得。
黃偉鴻好「惜」飲紅酒
廠商會永遠名譽會長楊孫西、會董黃偉鴻同李惠中都喺度。楊孫西最近喺福建武夷山斥巨資打造茶文化旅遊小鎮，大家都知佢鍾意品茶，擁有武夷山最大嘅茶廠。佢就笑笑口話今次係圍繞住茶廠再擴建一個結合茶文化同旅遊嘅特色小鎮，面積達九平方公里。睇嚟佢真心鍾意茶，佢就笑稱自己無論乜嘢茶、乜嘢酒都鍾意喎。
講到飲酒，最近做埋法國紅酒代理生意嘅黃偉鴻好有感觸，聲稱依家飲紅酒一定會飲晒，唔敢浪費。因為佢代理隱世小酒莊嘅出品，了解多啲先知該酒莊由種植葡萄、收割到釀造，都係莊主子女或老員工一手一腳去做。葡萄成熟快則三年、慢則五年先至收成，仲要釀造至少一年，佢話中國人成日話要珍惜食米，因為「粒粒皆辛苦」，但係稻米一年至少有一造，比起食米更加要珍惜紅酒喇！
卓妮