近年不時都有病人急需器官移植嘅報道，令香港人開始關注器官捐贈議題，不過目前登記咗中央器官捐贈名冊嘅人數，只佔香港人口不足百分之四，香港人捐贈器官意識仍然相當低迷。政府研究器官捐贈多年，甚至有計劃推行器官捐贈「預設默許機制」。香港器官捐贈行動組召集人周嘉歡尋日就話，香港器官捐贈風氣唔高，強硬推行只會令器官捐贈變成市民責任，搞到好似交稅咁，係違反大愛同自願嘅原意。要改變市民嘅觀念並唔容易，睇嚟食物及衞生局局長陳肇始都要努力至得喇！
