政情:同囡囡歐遊 葉劉不忘大事回顧

立法會同行政會議都已開始放聖誕及新年假期,雙料議員葉劉淑儀近日亦都同囡囡去咗歐遊,仲喺匈牙利布達佩斯品嘗地道美食。不過,葉劉除咗喺社交網站上載旅行靚相外,仲貼咗千字文去回顧香港一七年發生嘅大事,由立法會修改《議事規則》、高鐵一地兩檢,講到本港房屋及經濟問題,唔通介意有網民話佢掛住去玩?

千字文講今年港事

今次葉劉同囡囡去咗奧地利維也納同布達佩斯,而佢尋日就喺社交網站上載咗一篇一千二百幾字嘅長文講述「不平凡的二○一七」,當中提到政府雖用心製作施政報告,但對土地房屋問題仍束手無策,又話本港經濟增長主因係內地經濟增長及國外市場復甦,提醒政府要居安思危。

另外,葉劉旅行期間食咗唔少地道美食,包括維也納炸牛仔肉同匈牙利燉牛肉,仲有唔少街頭小食,唔知佢返港後使唔使努力減磅呢?

第一手消息請下載on.cc東網iPhone/iPad/Android/Windows Phone Apps