中環出更：楊耀忠難忘蒙古包打邊爐
潮流興發掘一帶一路商機，中華總商會常董余國春旗下嘅國貨公司都跟上潮流，最近喺總店舉行內蒙古名優產品展，仲搭建咗一個如假包換嘅蒙古包，早前舉行開幕式時，吸引香港教育工作者聯會名譽會長楊耀忠同埋香港內蒙古社團總會會長海峰嶺「入屋」去八吓。楊耀忠盛讚蒙古包冬暖夏涼，又話記得有一年冬天喺北京，天氣好凍，海峰嶺叫佢過去毗鄰北京嘅內蒙，眾人喺蒙古包內打邊爐，嗰種暖笠笠嘅感覺好難忘。
楊耀忠話，蒙古包冬天住就夠暖，夏天住就好涼爽，因為佢嘅設計夠晒透氣，而草原早晚溫差大，所以真係好啱當地使用，睇嚟楊耀忠對蒙古包都頗有心得。識得搭建蒙古包嘅海峰嶺就笑稱，蒙古包經過改良之後組合更加容易，當地人一般喺廿八至五十分鐘就搭得成一個喇。
余偉傑盼牧民文化傳承
香港鄂倫春基金會主席趙式慶、余國春兒子余偉傑、香港內蒙古社團總會秘書長高燕都有到場。趙式慶除咗熱愛武術之外，仲喺十幾年前創立鄂倫春基金會，致力保存即將消失嘅內蒙鄂倫春等少數族群。佢每年都會帶四十名大學生去當地考察，記錄族群遷徙、遊獵、宗教信仰及傳統工藝等，當日現場就展出咗唔少學生多年觀察嘅心得及相片。
出入內蒙咁多年，內蒙文化亦已融入咗趙式慶嘅生活，佢指住展場上嘅樺樹皮工藝品，話屋企用好多呢啲盒裝食物。余偉傑曾經同趙式慶去過鄂倫春，佢都話希望今次活動有助牧民傳統文化繼續傳承落去。
卓妮