政情：蕭炯柱率視障童演出 感動高官
心光盲人院暨學校及青年音樂訓練基金尋日聯合舉辦《MOY心光聖誕音樂會》，安排咗視障同健視嘅學生一齊演出，推動音樂無分界限。音樂會指揮、前高官蕭炯柱話，今次係佢第一次教視障小朋友，覺得教佢哋唱歌並唔困難，但樂器就教唔到喇。佢自幼學習小提琴，水平相當高，但教視障小朋友嘅話都係要請更加專業嘅樂器導師先做到喎。
蕭話得着多過小朋友
不過睇到班視障小朋友笑住演出，享受音樂，佢就覺得自己嘅得着多過班小朋友，令佢有動力繼續教落去。問到會唔會擴大樂團嘅規模，蕭炯柱就話現時樂團係中西合璧，中樂同西樂各佔六十個位，規模已經唔細，如果再加人手嘅話，將會好難安排合適嘅位置畀新人。
署理行政長官張建宗都有出席支持，仲大讚呢個計劃，話有效幫到有唔同需要嘅小朋友，仲自爆聽到佢哋嘅演奏覺得好感動，忍唔住抹咗五次眼淚添！