政情：邵善波一次過獲三份新工

新一屆特區政府計劃大幅改組中央政策組，連名都改埋做「政策創新與統籌辦事處」，令到喺今年七月卸任嘅邵善波變咗「末代中策組首席顧問」。講開邵善波，佢離開政府後非常低調，冇聽聞佢有乜新搞作。不過，政府尋日就發稿公布，話已經批准邵善波提出嘅離職後就業申請，而且一批就批咗三項工作咁多。

三項新工作包括為「中信改革發展基金會」擔任顧問、喺「中國人民大學重陽金融研究院」擔任高級研究員，以及出任「清華大學公共管理學院」嘅高級訪問學者。負責審批有關申請嘅委員會，認為邵善波接受有關工作唔會與之前嘅公職出現利益衝突，但同時亦訂出多項條件，包括唔可以利用當年以公職身份取得嘅政府機密資料等。

與邵善波同樣被視為「梁粉（梁振英支持者）」嘅前中策組全職顧問高靜芝，亦獲批准多一項離職後就業申請，喺「一鋪清唱有限公司」擔任董事。「一鋪清唱」係本港首個專業無伴奏合唱劇團，而高靜芝本身亦熱愛音樂，唔知佢有冇機會客串落場唱吓歌演吓劇呢？