由港澳台灣慈善基金會主辦嘅第十二屆愛心獎早前舉行頒獎典禮，共有六位來自中港台嘅愛心楷模獲獎，其中香港唯一得獎者係香港失明人協進會會長莊陳有。莊陳有話，今次獲獎係對佢推動社會共融工作嘅肯定，佢打算將十萬美元獎金用於推動內地失明人士就業，用香港嘅方法去訓練內地失明人士，就算喺普通企業都可以搵到嘢做，靠自己雙手自力更生。

離開政府約半年嘅民政事務局前副局長許曉暉（Florence）都有到場，身為今次愛心獎評委嘅Florence話，自己做評委期間聽到好多感人故事，又稱讚莊陳有喺推動失明人士就業方面做咗好多嘢，得獎係實至名歸。講到自己嘅最新近況，Florence話正同政府申請三項工作，未獲批之前就做住義工先，包括去中小學講香港歷史故事。

內地銀行家出身嘅國際公益學院董事長馬蔚華都係今次得獎者，卓妮見佢同上屆愛心獎得主、來自台灣嘅台塑集團總裁王文淵喺酒會時傾得好開心。創辦愛心獎嘅基金會創會主席林添茂就忙到滿場飛，佢笑稱十幾年來已累積產生近七十位愛心獎得主，希望持續透過呢個愛心平台令兩岸三地更加融合。

同場仲有林添茂嘅兒子林斯亮，佢喺三年前代理全球最大嘅有機嬰幼兒食品品牌，依家就研究緊寵物市場。林斯亮話，寵物市場一向被睇好，因為貓狗食嘢或睇病都貴過人喎。

卓妮