政情:再添一職 陸恭蕙獲准任科大顧問

唔少前高官離開熱廚房後都選擇執教鞭,而環境局前副局長陸恭蕙似乎對此甚為熱衷,繼早前獲批准任教香港及海外大學,最新嘅一份工作亦都係同大學有關。政府尋日公布陸恭蕙於今日(19日)起擔任香港科技大學環境研究所環境及可持續發展學部首席發展顧問,負責研究所嘅發展同落實計劃。

前任行政長官及政治委任官員離職後工作諮詢委員會認為,有關工作唔會損害或削弱政府履行職能嘅表現,亦唔會令人擔心陸恭蕙會得到延取報酬或利益,同埋唔會產生其他負面觀感而令政府尷尬。

離開政府後擔任多份教育工作

除此以外,早前政府已公布陸恭蕙多個新動向,包括出任科技大學兼任教授及美國加州大學洛杉磯分校(UCLA)客座教授。除咗教學,陸恭蕙亦擔任香港大學出版社作者,以及為私人慈善基金會獎項擔任顧問,睇嚟陸恭蕙離開熱廚房後嘅生活依然忙碌如昔。

第一手消息請下載on.cc東網iPhone/iPad/Android/Windows Phone Apps