政情：有相為證：吳錦雄出騎呢橫額 想玩重組句子？
有市民發現沙田區內出現為「關女性注婦暴力協會」進行義賣嘅活動，個名咁騎呢，雖然隻隻字都識，但係放埋一齊就唔知佢寫乜，到底呢個係咩協會呢？
貼完即宣傳 讀落先知錯
呢條橫額係屬於沙田區議員吳錦雄，而佢接受查詢時就承認係手民之誤，原本仲以為佢想同大家玩重組句子，吸引市民注意添！其實協會正確名稱為「關注婦女性暴力協會」。
不過，吳錦雄就冇將出錯責任推卸畀助理，反而大方承認自己喺逐個字貼上橫額時出錯，但貼完隨即嗌咪作宣傳時，望住嚟讀先發現有錯，當時已即刻作出更改咁話，所以呢個錯版只係出現好短時間喎。
咁短時間都被街坊捕捉到，睇嚟都好多街坊監察住佢呢位議員，以後真係要小心啲喇！