政情：新東初選論壇 張秀賢遲到賴塞車
民主派尋日喺旺角行人專用區就明年三月立法會新界東補選舉行初選論壇，新民主同盟前立法會議員范國威、工黨主席郭永健及成立立言香港嘅中大學生會前會長張秀賢均有出席，但張秀賢就遲大到，比原定開始時間遲成一小時先到。佢解釋係因為塞車，仲話證明香港塞車問題嚴重喎。
張與郭永健狙擊范國威
張秀賢到場後，就同郭永健齊齊「狙擊」范國威。話說論壇其中一個環節係由三人自由選擇問其中一個人問題。張秀賢及郭永健則全部都只問范國威，被夾擊嘅范國威都有反擊，但就連台下市民都唔幫佢。
范國威將矛頭直指郭永健，挑戰郭永健主打嘅工人權益議題，聲稱就算工聯會前立法會議員鄧家彪上到台，都唔會同佢講工人權益，只會批評民主派拉布啦。豈料呢番言論惹來台下市民炮轟，話人人都係打工仔，點可以唔講打工仔議題。張秀賢亦加把口，話勞工議題佢冇郭永健咁叻，但都有做功課，唔會好似范國威咁，如果被人問到勞工議題就「口啞啞」。雖然佢哋三人口口聲聲話初選係君子之爭，不過相信聽論壇嘅市民都聞到陣陣火藥味喇。