政情：印尼總統特使翁俊民 推介勝地點止峇里
本港有唔少印尼華僑，印尼總統特使翁俊民早前出席印度尼西亞商會創會及就職典禮時話，現時印尼景點愈開愈多，笑指好多港人提起印尼，淨係會話「峇里」，但其實印尼唔止有峇里島，佢推介兩個唔算熱門嘅景點，四王群島及多峇（巴）湖。
倡華僑二代返印尼投資
咁翁俊民又有冇去過呢兩個景點呢？佢話四王群島出名潛水，佢怕水，所以就冇潛水嘞，但就有同家人一齊去多峇（巴）湖玩吓，大讚風景極靚添！
翁俊民又話，有唔少印尼華僑嘅二代，可能喺香港出世，建議佢哋可以返印尼投資，覺得佢哋有唔少優勢，因為本身已經熟悉印尼情況，加上可以書寫印尼文，可以成為印尼同香港之間嘅橋樑同平台。據知，印尼未來打算興建多啲機場，等旅客同投資者可以容易啲去各景點，唔使轉機就可以慳番啲時間喇。