中環出更：小學生立會唱聖詩 難除市井議員戾氣
立法會建制派及民主派近日就修改《議事規則》爆發罵戰，民主派議員鬧人豬、狗、狼，樣樣齊，極盡侮辱，而且仲爆粗添，十足市井之徒，立法會形象乜都冇晒。不過，立法會尋日就舉辦午間音樂會，邀請一大班清純可愛嘅小學生唱聖詩同聖誕歌，同議事廳內激烈嘅氣氛呈強烈對比，可惜難以幫班議員去除戾氣同洗滌心靈，下午繼續鬧人。
立法會不時會邀請學生作午間演出，吸引到唔少議員捧場。不過，今次撞正立法會就修改《議事規則》開戰，所以捧場嘅議員就較以往少，只有教育界議員葉建源、鄉議局劉業強及田北辰，連立法會主席梁君彥都要喺表演期間走出走入，未能欣賞整個演出。
今次午間音樂會由第六十九屆香港學校音樂節優勝隊伍、中華基督教基灣小學（愛蝶灣）低年級詩班負責，一共為議員獻上五首歌曲，呢班學生更佩戴聖誕頭飾，夠晒節日氣氛，演出時又配上生動動作，成功博取不少掌聲。
同細路玩 楊岳橋被催添丁
演出過後，唔少議員都意猶未盡，再加上錯過演出嘅議員陸續現身，好似楊岳橋、莫乃光、林卓廷等。新婚嘅楊岳橋同小學生打成一片，帶埋頭飾，氹得佢哋好開心，所以莫乃光都叫佢快啲添丁，而呢班小朋友聽到都拍晒手，恭喜楊岳橋新婚，認真醒目。
林卓廷成碌木 唔知要唱歌
學生最後加唱多兩首歌，一班議員更加入一齊唱，做埋動作，非常投入。不過，本身高度已經非常突出嘅林卓廷，全程就成碌木頭咁企喺度無唱歌，表情好唔自然。佢解釋話以為齋睇表演，無心理準備要一齊唱，加上小朋友太可愛，佢就無謂大人扮細路喎！
卓妮