政情：狙擊領展兼助選 葉劉拍片一箭雙鵰
新民黨主席兼立法會議員葉劉淑儀喺上周三自爆因批評領展而被人恐嚇，尋日佢喺Facebook上載咗一條短片，內容係講三個港島區商場被領展賣咗之後嘅情況，指出有關商場嘅弊病，擺明繼續狙擊領展！明明葉劉前日先畀《蘋果日報》專欄作家暨公共政策顧問李兆富告佢誹謗，估唔到佢真係完全唔驚之餘，仲即刻就再採取行動添！
陳家珮都有出鏡 順勢拉票
其實，短片嘅主角唔止葉劉一個，仲有同屬新民黨嘅南區區議員陳家珮，而陳家珮素來都係葉劉愛將，亦都係盛傳會出戰明年三月立法會港島區補選嘅建制派人選，所以話葉劉呢條短片真係唔簡單，既幫自己繼續狙擊領展，又順勢幫陳家珮助選拉票，可謂一箭雙鵰。
話時話，陳家珮嘅疑似對手係年滿二十一歲、香港眾志常委周庭，而眾志主席羅冠聰同秘書長黃之鋒日前已上街為周庭拉票，面對周庭亦可能係民主派唯一嘅參選人，葉劉當然會把握任何機會幫陳家珮提升人氣喇！