政情：補選撞期撤例會補鑊？行會讓路人大

立會補選撞正兩會惹不滿

選管會早前預告會喺明年三月舉行立會補選，當時唔少建制派人士都已公開表示反對，擔心因為大批身兼全國人大或政協委員嘅建制派頭領要上京開會，而影響到佢哋嘅競選工程，導致建制派候選人喺補選中落敗。

其後更有消息指，除咗本港建制派，「上面」亦有人不滿有關決定，因為今次兩會喺五年一次嘅換屆會議，屬頂級嘅國家大事，喺內地省市幾乎咩都要讓路，香港作為一國之下嘅一個特區，冇理由好揀唔揀，揀正喺嗰幾日舉行立會補選呢類咁大型嘅政治活動，沖淡晒香港人對「兩會」換屆嘅應有關注。政務司司長張建宗事後亦承認，港府曾經向選委會提議為補選改期，無奈對方決定維持原判。

行會提早放假 避免再捱轟

到尋日朝早，特首林鄭月娥出席行會例會前表示，行會原定喺下周二嘅例會後，先至開始休會放聖誕同新年假，但由於下周二咁啱係港區人大選舉投票日，故決定取消下周嘅行會例會提早放假，等到明年一月九日再復會。

其實相對於「兩會」，港區人大選舉嘅重要性低得多，受影響人士亦極少，之前唔覺有人提出質疑，令人懷疑今次決定並非真係為咗讓路人大選舉，而係為之前嘅補選兩會撞期爭議補鑊，以免港府再畀人批評唔尊重國家嘅機關同制度。

現時行會裏面有四位港區人大代表，包括身兼召集人嘅陳智思、史美倫、葉國謙同廖長江，除咗史美倫已放棄角逐連任，其餘三人都有報名參選，要喺下周二現身投票同拉票，依家唔使開行會就方便好多。