中環出更：受惠長毛DQ 容海恩首設公屋議辦
今年七月再多四人被褫奪立法會議員資格，佢哋除咗要歸還立法會大樓內嘅辦事處外，設喺公共屋邨嘅議辦都要歸還房屋署，而立法會議員容海恩就因而受惠，首間設於公共屋邨內嘅議辦終於喺尋日開幕。
與黨友共同申請 抽中嗌好彩
根據房委會指引，最優先租用公共屋邨單位作議員辦事處嘅為當區區議員，其次係地區直選立法會議員同功能界別議員，而容海恩今次就同沙田區議會主席、黨友何厚祥合設議辦，佢都講明同黨友共同申請，抽中成功率會高啲咁話，而新議辦順利啟用就證明呢個策略正確喇！
容海恩仲透露，呢個位於大圍新翠邨嘅新議辦單位，前身屬於立法會前議員梁國雄（長毛），有關舖位喺長毛DQ之後先有得申請，而佢就喺十月中提出申請嘅。而佢聽街坊所講，長毛以前用呢個舖位時，多數用嚟存放物資。
對於今次抽中公屋新議辦，佢大呼好彩，因為供應好少，以往嘅地區辦事處多數都設喺私人物業內，再加上有唔少黨友係沙田區議員，所以能夠喺沙田區覓得議辦，已經夠晒高興o架啦。
卓妮