中環出更:又到聖誕Santa Mamas提早報佳音

雖然仲有個多星期先到聖誕節,但報佳音嘅活動已經開始。由城中名流夫人同政商界女強人所組成嘅報佳音組合Santa Mamas,經已走入公開場所向市民獻唱聖誕樂曲,Santa Mamas尋日就去到中環某商場,高唱經典聖誕歌曲,而素有「歌王」之稱嘅保監局主席鄭慕智除咗擔任指揮,仲高唱西班牙名曲,而佢太太就為佢鋼琴伴奏,可謂「夫唱婦隨」。

Santa Mamas嘅成員個個大有來頭,當中有「眾人媽打」之稱嘅民政事務局前常任秘書長李麗娟、賽馬會副主席周永健嘅太太胡慕芳、大新銀行集團主席王守業嘅夫人、馮氏集團主席馮國經嘅太太同遠東發展主席邱達昌嘅太太等。原來呢隊Satna Mamas由前年開始,每年十二月都有報佳音嘅活動。滙豐銀行副主席王冬勝太太王吳金薇話要歡度佳節,最好嘅方法就係同大家一齊分享,於是就同對唱歌有興趣嘅一班姊妹組成Santa Mamas向大家報佳音,期望所有港人都有一個開心、平安同快樂嘅聖誕節。

全女班獻唱 花三個月練歌

為咗唔失禮街坊,王吳金薇話一眾姊妹於報佳音之前,都會抽三個月時間嚟練歌,而喺啱啱過去嘅星期日,Santa Mamas就去機場為逾百名耀能協會嘅小朋友獻唱,各成員更自掏腰包捐款畀組織。

知名歌手陳美齡嘅家姐陳曦齡就話家人都具有相當嘅音樂細胞,但講到歌喉,就肯定唔及得妹妹喇,所以有機會嘅話,一定要拉埋妹妹嚟報佳音。對於今年嘅聖誕願望,佢話希望世界和平,因為中東同北韓嘅局勢實在令人憂心,手握軍政大權嘅領導人只要一念之差,就會影響到無數人嘅身家性命,因此大家都期望萬事要以和為貴。

卓妮

第一手消息請下載on.cc東網iPhone/iPad/Android/Windows Phone Apps