中環出更：教小朋友敬老孝道 田北辰：先培養禮貌誠信
百行以孝為先，相信每個人都明白呢個道理，但香港人嘅生活節奏急促，工作佔咗大部分時間下，難免少咗時間陪父母同長輩。已經係爺爺輩嘅立法會議員田北辰就分享經驗，話要聯繫親情唔需要成日見面，只要每年去一次家族大旅行就夠，又話要小朋友學識敬老孝道，就要由禮貌同誠信教起。
曾子主張以忠恕孝信為核心嘅儒家思想，香港曾子文化協會早前為曾子舉辦誕辰，協會主席曾榮輝同名譽會長衍瀧師傅等核心成員都忙於招呼到場嘅政商界人士。有份出席嘅田北辰喺分享時話自己每年都會搞家族旅行，同仔女及乖孫離開香港玩幾日，目的係聯繫親情，事關家族成員平時各有各忙，去旅行就有足夠時間團聚嘞！佢又話小朋友年紀細，未必明白孝道背後嘅意義，但係必須由細到大培養兩方面：禮貌同誠信，禮貌就係見到屋企人要打招呼，呢份對長輩嘅尊重係孝道嘅第一步；至於誠信，就係個人嘅基本品格，如果連誠信都欠缺就唔使講包括孝道在內嘅品德。
同場嘅另一議員柯創盛（柯仔）經常喺地區同長者傾偈，了解佢哋嘅需要。柯仔話氹老人家唔一定要成日陪伴在側，有時見到面拍吓膊頭，問吓佢哋日常生活情況，令佢哋知道有人關心緊佢哋已經係最好嘅支持。
徐英偉身體力行敬老
勞工及福利局副局長徐英偉（Caspar）亦贊同敬老係要身體力行，佢透露爸爸以前係老闆，一直要忙住管理成盤生意，但係當嫲嫲確診患上腦退化症，爸爸就毫不猶豫，立刻放低手上工作，全職去照顧嫲嫲，直至嫲嫲百年歸老。Caspar話爸爸嘅孝行感動咗佢，當時佢亦專程由加拿大飛返香港協助照顧嫲嫲，又話會將呢份孝順薪火相傳落去。
卓妮