長者有病難求醫 政府詐唔知

澳門表面雖然五光十色,惟內裏長者貧窮問題成社會焦點,政府卻是懶理。澳門六十五歲以上長者接近六萬人,佔總人口比例百分之九,超過聯合國劃分百分之七的標準,人口高齡化問題嚴重,預測到二○三六年,高齡人口更達到百分之二十七,解決未來長者福利問題迫在眉睫,有貧窮長者為節省買餸錢,要花數小時到內地購買多天餸菜,看醫生亦要行近句鐘「長命斜」,貧困長者在澳門要活得有尊嚴,可謂「難過登天」。

為慳錢 遠赴內地買餸

當中住在路環平民村近一百平方呎鐵皮屋,年近七十歲的張婆婆,就是其中一個掙扎求存的長者。「澳門豬肉一斤都要四十蚊,點食得起?我平時根本就唔敢喺呢邊(澳門)街市買餸煮飯,只好每隔兩、三日,就去大陸走一轉,買日用品同餸菜,價錢平澳門三分之一。每次去一次,要行長石級,又要搭車,來回都要五個幾鐘,辛苦啲都冇計。」面對近年消費物價上升,內地消費較澳門便宜近三分之一,張婆婆坦言,雖然舟車勞頓,但基層市民仍會跨區往內地採購,務求「慳得一蚊得一蚊。」

「睇一次醫生 好似受難」

除了要解決飲食所需外,村內長者還要面對更多民生問題。張婆婆續稱,「老人家多病痛,但我哋住得偏僻,唔近市區,病到死死吓,睇醫生,行落去巴士站,都要半個鐘至四十五分鐘,係咪『想死』?」張婆婆嘆道,若不是身體有大問題,她都甚少落山看醫生,因為行近百級石級及花上坐車時間,來回起碼要用上三小時,消耗她極大體力及精神,「去一次(睇醫生),好似受難咁。」對於這些問題,政府卻視若無睹。

斷電時村民自費搶修

平民村鐵皮屋普遍屬僭建,沒有正規水電提供,村民只有自行「駁水駁電」,因而斷水斷電的情況亦會不時發生,一旦無水,村民便要往山下公廁取水用,對長者居民更是煎熬;斷電時,村民只能自行出錢搶修。

外勞租住屢發生衝突

該村內大部分村民利用石油氣煮食,未能自行搬運氣罐的長者,就要加錢由氣體公司送貨,無疑對長者是「另類負擔」。有村民透露,平民村租金便宜,吸引不少外勞租住,由於言語不通及文化差異,過往亦曾有衝突發生,擔心日後會衍生嚴重治安問題,「呢度長者多,老弱殘兵好難同佢哋鬥。」

第一手消息請下載on.cc東網iPhone/iPad/Android/Windows Phone Apps