政情：楊岳橋新婚酒會 泛民為拉布遲到？
早喺九月就結婚嘅立法會議員楊岳橋（Alvin），尋晚設酒會招呼全體議員，雖然立法會目前正就修改《議事規則》一事而火花四起，但喺酒會初段到賀嘅議員就以建制派為主，包括立法會主席梁君彥，莫非佢同建制派關係較佳？
聖誕赴意大利度蜜月
酒會喺尋日黃昏舉行，雖然同立法會財務委員會會議撞時間，但都有唔少建制派議員抽空到場送上祝福，包括鍾國斌、張宇人、盧偉國及李慧琼等，唔少人帶同禮物到場，更祝福佢哋連生貴子。而泛民議員就喺稍後時間先陸續到場，但逗留時間較長，仲成班大叫「Alvin努力，三年抱兩」添。早前被褫奪議員資格嘅姚松炎同梁國雄亦有參加酒會。
打咗紅色領呔嘅Alvin，同身穿紅裙嘅太太打扮明顯夾過，更應眾人要求錫咗起碼五次。Alvin話，將會喺聖誕期間赴意大利度蜜月，希望唔好因為會議要改機票咁話。