政情：立會「邪門」健身室議員想變遊戲室

「常客」議員於上年換屆紛落選

立法會議員健身室究竟有幾「邪」，就連前議員陳偉業都有在社交網站提及過，話健身室嘅跑步機「殺氣」重，經常使用嘅議員都紛紛落選，包括在任議員期間經常出入健身室嘅民主黨李永達就喺二○一二年競逐連任失敗；工黨何秀蘭及李卓人亦經常使用健身室嘅跑步機，而新民主同盟范國威亦只係偶爾使用，但三人都喺去年立法會換屆選舉中敗選收場，太巧合，唔到你唔信。

秘書處早前就改善健身室設施諮詢議員意見，有議員就爆料話，同事對於健身室加設乜嘢設施都有好多諗頭，有同事就建議增加遊戲機、桌球枱、乒乓波枱、沙包同划艇機等，咁多嘢玩，聽到都覺得開心又興奮。

秘書處僅增設一部划艇機

不過，議員呢啲咁妙想天開嘅建議最後都係美夢成空，皆因秘書處考慮晒全數議員嘅意見之後，最後喺十月、即新一個立法年度只增加咗一部健身器材划艇機，而遊戲機方面唔單止冇加到，仲連原本嗰部遊戲機都搬走埋添！唔知係咪因為增加咗划艇機之後，健身室空間細咗，連電視都由兩部減到一部喇。此外，秘書處文件顯示，健身室將於本月十七日至下月二日關閉，以進行照明改善工程。

其實立法會始終都係議員開會議事及辦公嘅地方，若健身室如部分議員所願，變到好似遊戲室咁，搞到啲議員掛住玩就弊喇；況且現時民主派議員都掛住拉布，建制派議員又忙於留守議事廳應付民主派，仲邊有議員得閒去健身室玩吖，可能玩多幾玩，換屆選舉連議席都玩到冇埋。