中環出更：挽回美容業形象 曾裕首推責任保險
美容醫療事故不時發生，令美容院撇唔開負面形象。香港美容從業聯會（聯會）尋日宣布推出全港首個美容專業責任保險以及調解服務，主席曾裕話，該會真正由美容從業員組成，推出計劃嘅目的係要話畀政府及消費者知，美容業界係專業嘅。佢話過去政府立例規管業界時，出席諮詢會議嘅未必係美容院經營者，若佢哋再坐視不理，或可能摧毀美容業。
職業訓練局保險業訓練委員會主席管胡金愛負責設計此一全港獨有嘅美容責任保險保單。管太話，有關保險乃參考歐美國家做法，只要加入聯會並取得該會「優質美容商戶認證計劃」嘅美容院即可購買。佢話美容界一向好難單獨買保險，計劃最大特色係以團體形式受保，業界就可用低廉價錢購買，為美容院及消費者提供全面性嘅保障。
陸庭華笑言生意唔會多
香港調解聯盟會長陸庭華、有「調解之父」之稱嘅立法會議員蔣麗芸（Ann）老公梁海明都有到場。陸庭華話聯盟為金額少於五萬元嘅個案提供首三小時免費調解服務，超過金額或時數嘅個案先至會收費。不過佢笑稱業界咁自律，睇怕生意可能唔係好多。梁海明就話自己調解過唔少家庭糾紛，卓妮問佢Ann咁火爆，有咩秘訣保持家庭和諧，佢就笑稱老婆係被人「辣着」先嬲啫，唔「辣」佢咪得囉！
聯會副主席謝欣玲同女兒陳冰諾、兒子陳思銘都喺度，佢哋都好支持今次嘅行動，事關佢哋間美容集團都遇過糾紛，後來搵梁海明幫手調解先搞掂。陳冰諾話，有中立嘅第三者做和事老，效果確實唔同啲。
卓妮