澳門的亂象愈揭愈有，也愈揭愈臭，單係海關連爆糗事已令人應接不暇，包括發生兩宗倒掛五星旗，以及外國醫生團體在澳門等候噴射船返港期間遭搞事分子挑釁，海關人員不分青紅皂白，將一團人一併扣查。有澳門立法會議員對事件感到莫名其妙，並指兩個人爭執咪處理嗰兩個人囉，點解會將其他同行者都扣查！阿哥，家陣係乜嘢時代啊，仲玩「連坐法」？話澳門政府衰過晚清，真係一啲都冇講錯。
觀乎澳門之亂象，多涉及人為因素，像強颱風「天鴿」吹襲死傷慘重、風災過後政府對受影響商戶支援不足、多項公共工程滯後、醫療事故不絕、巴黎人酒店仍驗出退伍軍人桿菌，最新一單就係遭歐盟列入「避稅天堂」黑名單。法國堅持被列入黑名單的，應對其實施更強硬措施，包括不可獲歐盟及世界銀行的資助。澳門政府死口唔認，仲話正研究完善離岸業務法律制度。唉，從澳門海關亂咁扣留外國醫生團體，至今仍未交代和道歉，就知澳門政府管治幾咁無能，「完善」離岸業務法律制度喎，聽住先！反正老朽就不信了！
主張「性惡論」的荀子認為，好多社會亂象嘅產生，好似百姓飢餓、路有凍餓至死嘅人，父子間互不信任、君臣彼此背離等，都係人為的災禍，他稱之為「人妖」，其中一點說到「政令不明，舉措不時，本事不理，夫是之謂人妖也」，意思是，政令不清明，各種舉措不合時，對農業生產放任不管，這些叫做人為的災禍。
澳門近排可說是「人妖」當道，否則就不會頻生事端。倒掛五星旗一事，日前就話調查完成，涉事職員不過是罰款、停職，其餘一概沒有交代。而海關扣留外國醫生團體一事，其處理手法之低下，令人慘不忍睹，一個靠旅遊業食飯嘅地方，竟然對旅客玩「連坐法」，如此混吉之事，不是人妖當道是甚麼？