政情：港島補選或遇周庭 陳家珮預冇宅男票
立法會四個議席空缺將於明年三月舉行補選，新民黨嘅南區區議員陳家珮（Judy）正考慮參選港島區補選，面對香港眾志常委周庭亦積極考慮參選，有望係民主派唯一候選人。周庭剛年滿二十歲，Judy尋日同傳媒茶敍時話自己現時三十七歲，「青春係冇得呃人」，笑指自己一定吸唔到宅男票，「如果吸到我都好驚」。
話支持者主要係在職媽媽
雖然吸唔到宅男票，但Judy相信佢嘅支持者主要會係在職媽媽、專業人士等等，相信「女權主義」，媽媽喺屋企嘅地位都有一定影響力，明白「後生投後生」好難避免，「我唔可以逆齡吖嘛」，但會聆聽同努力協助年輕人解決問題。
佢又承認曾聽聞有地區聲音不滿佢冇事前「打招呼」，拜託各地區人士支持佢，自己本月會開始與新民黨主席葉劉淑儀一同約見各地區人士，尋求支持。