中環出更：曾耀祥娶醫生新抱：夠數開醫學美容診所
博愛醫院永遠顧問曾耀祥（Thomas）早前榮升新老爺，喺東華三院旗下醫院做眼科醫生嘅仔Alan同公立醫院外科醫生Melody擺酒結婚，Thomas成晚開心笑唔停。育有一仔一女嘅佢話囡囡係兒科醫生，依家加埋新抱，屋企就有三名醫生，笑稱夠開一間潮流興嘅醫學美容診所喎。
Thomas唔止做過博愛主席，亦做過東華總理，所以當晚好多慈善界人士去飲。卓妮見到東華前主席陳文綺慧（Viola）同老公陳宇齡，Viola做東華主席時忙到瘦晒，依家終於回復狀態，唔知有乜秘訣呢？Viola笑稱日日飲黑杞子茶，因為黑杞子嘅花青素高過藍莓，佢仲食埋滋陰補腎嘅黑豆丸。
陳宇齡食中藥古方補眼
陳宇齡係中醫藥公司主席，養生自然有一套。佢除咗飲黑杞子茶之外，仲會食中藥古方「杞菊地黃丸」，目的係補眼。點解咁注重保護雙眼？原來幾年前佢驗出有隱性青光眼，結果食咗兩年「杞菊地黃丸」，再驗番眼竟然冇事，醫生話佢雙眼唔止冇退化，淚水分泌仲好似十六歲後生仔咁好喎。
開婚宴專門店嘅博愛副主席陳首銘都有到賀，佢仲排隊攞咗棉花糖食，成個大細路咁。最近城中咁多婚宴，唔使問都知酒樓生意好好。陳首銘笑笑口承認呢幾個月嚟確實生意好好，尤其係呢個月差唔多廿間分店都爆滿，破咗集團成立十幾年來最好嘅紀錄。佢仲話如果有好嘅地點，都會繼續擴張。
卓妮