政情：鄺美雲選港區人大 盼「生命影響生命」
再有藝人從政參選！繼八和會館理事會主席汪明荃早年曾擔任港區人大代表，前港姐袁彌明又曾參加立法會、區議會選舉，最新一人係身為珠海社團總會會長嘅歌手鄺美雲，佢尋日於香港青年聯會顧問陳仲尼、前沙田區議員楊文銳等人陪同下，提交共三百八十張提名票，正式報名參選新一屆港區人大代表選舉。
冀成兩地橋樑 凝聚共識
鄺美雲於報名後剖白參選港區人大嘅心路歷程，透露自己十多年前已經開始喺內地參與援建學校，盼望「以生命影響生命」，又表明一旦當選港區人大，希望能夠成為內地同香港嘅橋樑，凝聚各方共識。
與鄺美雲一樣同日報名嘅仲有律師會前會長林新強、民建聯成員季霆剛等人，外界流傳擁有二百多票嘅民主派有意狙擊林新強嘅選情，林新強回應話唔會理會佢哋，但同時形容「被狙擊係一種榮幸」，重申最重要係獲得選民祝福喎。