政情：公民講場：公帑填氹 港珠澳橋超支 陳帆冇交代

港珠澳大橋完工在即，運輸及房屋局公布主橋超支約一百億人民幣，雖然係由三地攤分，但按照攤分協議，港府需要再多付四十三億元嘅超支費用，即係又要公帑去找數填氹。最離譜嘅係咁大件事，局長陳帆竟然冇親身出嚟交代，畀班立法會議員鬧爆處理不當之外，仲話要徹查各部門有冇出現監管不力嘅問題添！正所謂醜婦終需要見家翁，尤其呢筆超支費用要立法會批准嘅，陳帆想龜縮都好難。