政情：黃錦星當年用馬桶挑戰政府
環境局局長黃錦星本身係建築師出身，而喺大學畢業後曾參與環保屋邨項目，期間佢曾與政府交手，竟然係同馬桶有關。
黃錦星最近接受馬會刊物「駿步人生」訪問時透露，喺港大建築系畢業後曾參與環保屋邨項目，發現基於公共衞生原因，要求沖廁水要達到某個數量或以上，為咗慳番啲廁所水，佢就搵咗啲外國例子，證明馬桶節省用水，同樣沖得乾淨，仲做埋示範同報告，終於爭取到法例豁免，更影響到日後政府修例添！呢次馬桶挑戰法例，可謂係佢嘅重要勝仗。
兒時一家住板間房
喺訪問中，佢又講到童年時一家七口住喺深水埗唐樓一個板間房，只有一張雙層碌架床，廚廁共用，後來搬到慈雲山屋邨，變成一家九口。佢形容邨後嘅郊野公園係香港第一代嘅郊野公園，用最低消費享受大自然美景，而喺中五會考時，會貪寧靜而帶書上山溫習，考完試就長征啱啱落成嘅麥理浩徑，仲話行山習慣維持到現今，仲不忘提醒市民行山時唔好留低垃圾喺山頭添！