政情：羅永聰做校慶司儀 着校服仲鬆動
前財政司司長政治助理羅永聰離開政府後，開設咗兩間顧問公司搵真銀，而近日再有新動作，就係出山為活動擔任司儀。佢仲專程買校服去配合活動，身形有番咁上下嘅佢就透露校服仍算鬆動添！
羅永聰將喺呢個星期六，為慶祝母校皇仁書院成立一百五十五周年嘅晚宴擔任司儀，今次更係佢中學畢業後首次做司儀添！佢笑稱，被舊生誤會好得閒先獲邀做司儀，但相信佢都享受呢個任務，事關佢都明言鍾意講嘢。
自爆身形比中學時大一倍
為咗配合校慶，佢同其他司儀都買咗校服準備喺活動上着，更自爆現時身形比中學時代大咗一倍，但估唔到校服供應商竟然有咁大尺碼，着上後仍然鬆動。睇嚟佢仲有發福空間喇！
校慶晚宴召集人鄭健一透露，當日參加者同表演者多達一千五百五十人，而節目以音樂表演為主，當中包括無伴奏合唱。另外，多位知名校友表明會出席，包括香港中文大學校長沈祖堯同金管局總裁陳德霖等。