政情：又唱衰中港 林卓廷用盡公費外訪
民主黨（白鴿黨）議員林卓廷上個星期代表香港立法會到訪英國，出席當地國會議事常規會議同課程，但係佢就趁機用盡外訪公費去「唱衰中港」，繼提早幾日離港赴英向當地執法機構舉報前特首梁振英UGL事件後，尋日佢再次向前宗主國批評指中央推出假普選方案，要求英國發聲。
林卓廷尋日同三名英國國會議員，包括當地工黨嘅Catherine West，以及保守黨嘅Jeremy Lefroy同Fiona Bruce會面，林卓廷繼續一貫「唱衰」嘅風格，指香港發生人大釋法、新聞同學術自由倒退，以及廉政風暴等，又提到近日香港建制派再次提出為《基本法》第二十三條立法，形容係中央想收窄港人嘅自由。
連英政府都鬧埋
佢又認為中央政府違反二○一七年普選特首嘅承諾，推出假普選方案，係無落實《中英聯合聲明》嘅承諾。佢鬧多兩鬧，竟然連英國都鬧埋，指英國政府「居然發聲明要呼籲港人接受（假普選）」，指對方「可恥」（Disgraceful），總之乜都鬧一餐。至於三名國會議員，就淨係話會密切留意香港嘅情況。