中環出更：朱凱廸民望暴跌 怪招拉布惹禍？
喺梁國雄、劉小麗、羅冠聰同姚松炎被DQ立法會議員資格後，最新嘅民意調查結果顯示，喺十大立法會議員當中，非建制派僅佔四人，其中自決派兼新西票王朱凱廸評分更大跌五點七分至四十六點三分，由原來第三位跌至第七位。朱凱廸近期連番出怪招拉布，喺審一地兩檢方案嘅無約束力動議時，更引用《議事規則》要求新聞界及公眾人士離場，被鬧爆剝奪公眾知情權，可能係導致今次評分暴跌嘅原因。
非建制派僅4人入前10名
港大民意研究計劃喺本月八至九日調查市民對議員嘅熟悉程度，而喺本月十四日至十六日則進行第二階段嘅評分，訪問逾千名市民。評分結果顯示，非建制派僅有四人保住喺十大之列，包括民主黨涂謹申、公民黨陳淑莊、朱凱廸以及議會陣線毛孟靜。
當中以朱凱廸嘅評分跌幅最大，排名下跌四位排第七，涂謹申嘅評分下跌四點八分，排名跌兩級排第三位，陳淑莊亦下跌二點九分，排名由第四位跌至第六位，毛孟靜嘅評分則跌二點五分，排名則下跌三位排第八名。
建制派方面，實政圓桌田北辰再次登上榜首，新民黨葉劉淑儀繼續排喺第二名，經民聯梁美芬再次上榜排第九名，民建聯蔣麗芸則下跌兩位排第十名。
卓妮