中環出更：「做唔到要出聲」蒙德揚談日本職場文化
日本一向出名產品嚴謹，但近日竟爆出金屬材料造假等多宗造假事件，真係令人大跌眼鏡。卓妮早前喺馬場遇到一向做開電器生意、同日本人有唔少合作嘅蒙德揚，佢話聽到今次嘅事件覺得好驚訝，估計可能係高層想做好啲，中低層做唔到，就想側側膊，但相信即使日本造假，標準都仲係好高嘅。
蒙德揚話有時會覺得日本人做嘢慢吞吞，其實係因為佢哋做事小心同超認真，但日本人講嘢比較間接，好鍾意用「檢討」、「研究」，其實一用呢啲字眼，九成做唔到，自己有時都同佢哋講，唔好浪費時間，做唔到同我講做唔到，不過日本人近年同外國人做生意接觸較多，文化亦開始有轉變，至於自己作為公司高層，要求都幾高，但亦成日同下屬講，如果做唔到要出聲，「唔好跣我」，仲不時同公司中層飲吓酒，等氣氛輕鬆啲，下屬反映問題都容易啲。
鄧慶治冇畀當地造假影響信心
從事相機生意嘅鄧慶治亦有同日本人合作，認為造假事件冇乜影響信心，覺得呢啲問題邊個國家都有，例如有啲食品公司會為生意將生產期改期，但亦有啲公司會為商譽唔要成批貨，係公司操守問題。佢又話依家好多日本貨都未必全部喺日本生產，好多喺外國設廠做零件，所以產品好唔好，都係視乎廠同品牌對於質素嘅保證。
東華三院副主席王賢誌就覺得呢啲造假事件唔會影響港人對日本貨嘅信心，正如內地都經常爆出黑心嘢，港人都係照去，又正如啲人成日話日本有輻射都係照去。佢又提起讀大學時曾喺東京做一個半月暑期工，又笑指有啲嘥時間，事關當地人自我保護意識好強，對外國人都係好客氣，但永遠都唔會融入到佢哋嘅世界。
卓妮