政情：郭永健接掌工黨 老鬼賴死唔走

冇新血加入 恐後繼無人

工黨新一屆主席為大埔區前區議員郭永健、副主席（黨務）為譚亮英、副主席（外務）為李卓人、東區區議員麥德正任副主席（政策研究）、陳昭偉出任紀律委員會主席、秘書長為李文峰、副秘書長由曾國輝出任，司庫則為何偉航。至於喺今年八月底同胡穗珊嘈完辭咗執委同副秘書長職務嘅何秀蘭，就改為擔任團體執委。譚亮英仲話未來工作就係幫個黨吸新血，尤其係要吸啲年輕人咁話。換言之，班老鬼賴死唔走，又冇新血加入，睇嚟好快後繼無人。

月底開會 討論初選人選

郭永健新上場就即刻話希望未來可以帶領工黨走出低谷，講到明依家得張超雄係立法會議員，個黨喺議會聲音非常薄弱，市民都唔係好識得佢哋。佢又話唔想畀工聯會獨大成為勞工階層嘅聲音，覺得可以參加明年立法會補選，所以民主派要團結一致去應戰，希望可以贏番個位，共同對抗建制派，佢仲爆工黨月底會開個特別會議，討論派乜嘢人去參加泛民搞嘅初選，唔排除只有佢去參加新東初選，但就強調乜都未傾掂。至於李卓人可能自知都衰硬，所以講明自己唔會參與補選。

泛民初選傾到埋尾，工黨先叉雙腳入去，簡直就係多隻香爐多隻鬼。郭永健解釋一直都冇參加初選「持份者」協調會，只係參加咗民主動力嘅協調機制，仲話呢個諗頭唔係突然有，半年前已開始諗，但又唔見有初選機制，「如果班大佬死都要衝，咁講嚟都冇用喇」，而且如果工黨一開波就話選，畀人覺得泛民又亂咁鎅票就唔好喇，咁依家有機制咪考慮吓囉，強調自己冇刻意隱瞞呢個諗頭。