中環出更：重遇卿姐 莫嘉嫻轉會棄做OL
民協前主席莫嘉嫻正式加盟民主黨（白鴿黨）後，喺早前嘅社民連會慶，重遇一早已經搵佢入黨嘅白鴿黨前主席劉慧卿（卿姐），莫嘉嫻回覆查詢時自爆，如果唔入白鴿黨，可能會做OL！
莫嘉嫻憶起加入白鴿黨嘅經過時話退出民協後，曾經做過OL一段時間，如果唔係得到白鴿黨嘅賞識，都未必會繼續從政，可能會繼續做OL，好多謝該黨從來都冇放棄繼續邀請佢加盟，尤其係卿姐、立法會議員黃碧雲同胡志偉。
對出戰立會存開放態度
至於依家轉去九龍東幫手，而唔係留喺一直做地區工作嘅九龍西，莫嘉嫻就話係畀自己重新開始，忘記背後，九龍東好多新人，白鴿黨希望都有多啲中層幫手帶吓新人。至於日後會唔會出戰立法會，佢就話太長遠，依家都係做好地區工作，日後係點，白鴿黨同佢都係開放嘅。
卿姐喺社交網站上載與莫嘉嫻及其兩名囡囡嘅合照，仲留言話熱烈歡迎莫嘉嫻加入，希望合作愉快。睇嚟莫嘉嫻呢個新開始，都相當多黨友錫住佢！
卓妮