中環出更：埃及生死之旅 史顏景蓮：火車被亂槍掃射
呢排有對夫婦諗住報團坐郵輪環遊世界，殊不知要接種黃熱病疫苗，因為可能會影響身體，搞到環遊夢碎。尋日喺馬場遇見仁濟醫院總理史顏景蓮，佢就試過喺埃及經歷生死，坐火車被亂槍掃射，真係去個旅行都一額汗啊！
史太憶述好多年前同老公、香港中華廠商聯合會副會長史立德，同埋二十個朋友一齊去埃及，坐不停站火車去開羅，半夜大家瞓緊覺，突然聽到嘭嘭聲，史立德就出去睇吓乜嘢事，見到出面有啲恐怖分子向火車亂槍掃射，啲玻璃窗都爛晒，嚇到個心都離一離！史太個女史佩加仲話，嗰陣喺屋企都有預感有唔好嘅事發生。
史太又話，去旅行其實有好多嘢要注意，好似佢之前去美國旅行，喺內陸過境拉斯維加斯，成班朋友一人買一大袋水果，點知原來唔過得境，逼住要食晒先可以過關，佢笑住話，嗰陣成班人好似難民咁，不停咁食，最後食唔晒焗住要送畀人。
陳李妮帶檸檬過關遇截
博愛醫院永遠顧問陳李妮都有類似經歷，仲因為一個檸檬，搞到畀海關誤以為帶咗違禁品！佢話習慣每日出門口前都要飲杯檸檬水，仲話Keep得咁好都可能係靠呢杯水。所以佢去親邊都會帶幾個新鮮檸檬喺篋，費事去到當地冇得賣，點知有次去成都，攞行李時有隻搜查犬圍住個篋轉，海關要佢開篋，就發現都係檸檬惹的禍，嗰吓先知水果唔入得境！佢話好彩依家啲酒店有檸檬供應，唔係都唔知點算。
仁濟醫院主席嚴徐玉珊就笑住話好多地方都查得嚴，好似加拿大同澳洲，好多嘢都係違禁品唔帶得。點解咁清楚？佢話自己仲係做女嗰陣去加拿大，可能係單身女仔，過關嗰陣畀海關翻箱倒籠，乜都攞晒出嚟摷，檢查清楚先入得境，所以以後都好小心，依家同老公去旅行都少啲機會要畀人Check嘅！
卓妮