政情：田二少坐綠VAN 嚇到走人
立法會議員田北辰（田二少）尋晚喺Facebook貼文，話喺凌晨時分，坐咗架「吉」VAN出旺角花園街，經過某條漆黑隧道後，就好似進入異度空間咁，車上全部乘客同司機都不知所終，唔通佢遇到靈異事件？呢架由來神秘嘅綠VAN，尋日又突然浮現喺佢眼前，一向冇有怕嘅佢打算上車睇吓有何怪力亂神，點知未上到車，佢就掉頭走。
點解全車會冇晒人？佢終於開估，唔係乜嘢鬼怪，而係講緊十九座嘅綠VAN，喺上車位凸咗一級樓梯，搞到啲乘客叉錯腳受傷入院，同外界隔絕。司機又因為唔想畀多保險費，個個嘈住話轉行，架綠VAN咪一個人都冇囉，仲反問係唔係詭異呢？
19座「有伏」 斥局方拒拆彈
佢話喺今年八月應約首次參觀過十九座小巴，當時已經覺得凸出呢一級好危險，但運輸及房屋局一意孤行，依家怨聲四起收唔到科，仲問局方幾時先肯拆彈？勢估唔到佢批評政府部門甩漏，好似講鬼古咁。