政情：唱衰中港 林卓廷未夠班公費訪英遭冷待
過往經常有立法會議員被揭濫用公費外訪行程，以提早出發或延遲返港等方式，留在海外觀光旅遊及探親會友，慳番大筆機票同簽證開支。民主黨議員林卓廷同建制派議員何君堯，本周代表香港立法會到訪英國，出席為期五日的英國國會議事常規會議及課程。其中林卓廷提早了幾日離港赴英，除了向當地執法機構舉報前特首梁振英UGL事件外，還借機向前宗主國「唱衰中港」，仲衰過濫用公帑到外國吃喝玩樂。最慘係佢今次去到英國遭到冷待，只獲安排會見啲低級官員，連做「漢奸」都未夠班！
要自行發稿拍片
立法會上周五（10日）最後一日辯論及表決施政報告致謝動議，林卓廷票都唔投，就搶閘飛咗去英國倫敦。佢首先去咗當地的英國國家重案署（Nation Crime Agency）轄下國際貪污調查組（ICU），親身舉報梁振英涉嫌收取UGL公司五千萬港元事件，聲稱對方花了一個半小時處理其投訴。
同日下午，林卓廷又到了英國外交部與負責香港事務代表Warren Leigh會面。佢聲稱喺一小時的會面中，對方好關注香港的政治情況，包括多名民主派立法會議員被取消議席、多名社運人士同青年領袖被重判入獄等。
林卓廷在會面中要求英方密切關注《中英聯合聲明》與一國兩制的實踐情況，批評中國政府違背承諾，無給予香港落實真普選。對於英國當年建議港人將人大「八三一」框架下的普選特首方案「袋住先」，林卓廷直斥有關言論荒謬，強調港人絕不接受假普選方案喎。
相對於香港民主派近年的多次訪英行程，例如「李漢奸」民主黨創黨主席李柱銘、「民主阿婆」前政務司司長陳方安生，以至正保釋等候上訴的香港眾志黃之鋒、本土民主前線梁天琦等本土派及港獨人士，林卓廷今次「唱衰中港」之旅，明顯遭到當地政界同傳媒冷待，搞到要自行發稿同影相兼拍片。
國際社會冇人識
咁又好難怪英國方面嘅，事關林卓廷講老唔夠老，講嫩又唔夠人嫩，在香港的知名度已唔高，去到國際社會更加冇乜人識，人家肯咁樣招呼吓你已經算好畀面喇。原本佢仲話會到訪當地的稅務及海關局，要求調查梁振英有冇喺交易中逃稅，點知轉頭又話已經請英國外交部代為轉達訴求，要求英國稅務及海關局徹查梁振英UGL事件，對方亦答允代為轉達。至於係咪稅務及海關局冇人得閒招呼佢，咁就唔知喇。