政情：回魂立會 小麗叫坐低傾補選
話說立法會墟市事宜小組尋日朝早召開會議，有本來係小組主席、但已被褫奪議員資格嘅劉小麗再度「回魂」，以博士身份列席會議，繼續鬧爆政府冇好好搞墟市，小麗仲話班官員都依舊同一副嘴臉。小麗自DQ後頻頻喺立法會現身，就算今次係由主席位坐番落列席位都未有唔慣，睇嚟已經習慣咗自己依家個身份喇喎！
至於明年三月就立法會四個議席出缺進行補選，日前傳出泛民淨係協調初選都搞到七國咁亂，民主黨仲建議「棄保」，擺明要推冧初選，而個別泛民已經鬧爆話「棄保」唔掂，快啲傾點初選好過。
拒回應會否參選
泛民一人一句，協調會依家立立亂，都唔知點搞？但劉小麗淨係話希望大家盡快坐低再傾吓。咁考唔考慮參選，佢就耍手擰頭話唔回應喇！