中環出更：清潔龍「執葉」 食署抽何君堯水？
本身係律師嘅立法會議員何君堯早前捲入虛報英國及新加坡「執業律師」風波，後來佢承認只係具有執業資格，故此急急喺其律師行網站修改個人簡介。事件原本已經冇乜人再提，但食環署Facebook專頁日前出咗一則貼文，見到清潔龍「阿德」拎住幾塊樹葉，仲寫住「我喺香港執葉」，懷疑係抽何君堯水，仲有網民大讚「靚抽」添！
Fb提醒市民咪亂丟垃圾
貼文出現喺食環署幫「阿德」開嘅專頁，本來係想提醒大家，天氣轉涼，地下開始有落葉，清潔工人忙於「執葉」，呼籲大家唔好將啲垃圾掉落地下，加重工人負擔。點知網民多嘢諗，見到「執葉」即聯想到何君堯嘅「執業律師」事件。
有網民笑言「空氣濕度急劇下降」，亦有人擔心「阿德」被投訴，「因住有人用英文寫信比（畀）你／你老細」，亦有要求高嘅網民話今次反應有啲慢囉。網民反應咁熱烈，但就唔見有人留言撐番何律師，認真慘慘豬。
卓妮