中環出更：陳肇始搵舊生做政助補位幫拖
政府尋日公布新一批政治問責官員任命，財經記者出身嘅前商台新聞及公共事務副總監何翠萍被委任為財政司司長政治助理，前醫院管理局服務轉型部行政經理鄭守崗就出任食物及衞生局局長政治助理，令到包括十二名副局長及十四名政助嘅擴大問責制團隊，歷來首次齊腳。
問責團隊女性比率得23％
鄭守崗同現任食衞局副局長徐德義曾經喺同一時間任職醫管局，但據悉兩人當時一個喺總部返工，另一個喺醫院做，並冇直接從屬或共事過。反而鄭守崗喺香港大學攻讀護理學學士及公共衞生碩士時，就做過現任食衞局局長陳肇始嘅學生，估計係之前盛傳會出任食衞局政助嘅港台節目主持蘇敬恆畀建制派「篤死」後，陳肇始搵番自己嘅舊生加入「熱廚房」補位幫拖。
此外，現屆政府嘅問責團隊開初埋班時陽盛陰衰，三司十三局主要官員與十二名副局長當中，加埋都只係得陳肇始同教育局副局長蔡若蓮兩位女士。現時十四名政助當中有七名女性，加埋特首連同全體政治問責官員，女性比率亦只有兩成三，年齡方面則有十二人屬四十歲或以下，比率為兩成八。
卓妮