政府由今屆區議會開始，向每名區議員發放一萬蚊嘅外訪津貼，唔少區議會選擇返內地考察，灣仔區議會原本有望成為首個去外國考察嘅區議會，但原來外訪活動已經難產。
灣仔區議會原定喺十一月五日至九日外訪大阪及京都，包括考察大阪市議會、地下空間同養老院等。啱啱辭去外訪活動工作小組主席嘅區議員林偉文話，原本覺得細旅行社會平啲，所以格咗三間細旅行社價錢，最後揀咗一間又平又可以幫手聯絡當地政府嘅，六、七月嗰陣嘅報價係萬三蚊，全包小費同翻譯等，即係每人需補貼三千蚊。佢話當時要等區議會主席吳錦津盡快簽封信畀日本當地政府，點知拖咗個幾兩個禮拜先簽到，再加上民政專員放假，有啲程序處理唔到，搞到八月中後期，費用已上升三千蚊。
其後吳錦津要求佢搵多兩間大旅行社格價，林當時已提醒，原本選定嘅旅行社必須喺九月三日前落訂，否則就唔會係萬六蚊。結果，兩間大行嘅報價連翻譯費都過兩萬蚊，仲要區議會自行聯絡當地政府，所以最終都係揀原本嘅旅行社。
林偉文其後就搵區議會秘書處通知各人盡快交錢，但到限期前只有兩、三個人有交，最終搞唔成，其中一個增選委員仲喺限期當日同佢講，自己嘅護照過咗期，所以唔去。佢話當時距離外訪仲有咁多時間，足以去續期，「唔想去咪講囉，搵啲咁低能嘅理由，當我係白癡」，佢覺得外訪小組係個笑話，所以已去信辭去小組主席一職。