政情：譚文豪打破航空界美麗幻想
網上不時會流傳好多航空界嘅傳聞，最常見就係好多人會話，唔少空姐都會睇中飛機師，每個飛機師會有好多個空姐爭，飛機師唔愁冇空姐女朋友。本身係飛機師嘅立法會議員譚文豪就話，呢啲講法完全係美麗嘅幻想，飛機師係唔會畀好多空姐圍(口架)！
機師唔會畀空姐「圍」
譚文豪話每班航班都會有唔同嘅飛機師同空姐、空少組合去服務乘客，所以根本就唔會係同一班人經常合作，即使同一班機，飛機師同空姐嘅逗留時間都未必一樣，所以根本唔會畀空姐圍，呢個完全係美麗嘅幻想。
佢又話其實飛機師要留喺駕駛室，畀一道防彈門隔住，唔會個個空姐都見晒，只有個別空姐會去服務佢哋。咁樣聽落，飛機師都幾孤獨喎，唔似得空姐同空少可以互相交流。