政情：韓國通莊學海睇好商機無限
香港吹起韓風多年，由追韓星、韓劇到旅遊，似乎愈吹愈勁。早前喺韓國國慶酒會見到家族做鐘錶生意嘅香港鐘錶科技中心主席莊學海（Bob），原來佢都係韓國通。韓國一間國際知名手機品牌出產嘅手機外殼玻璃，Bob旗下移動設備零件公司都有份供應，認真犀利。
同唔少韓國大集團有合作
Bob笑笑口話雖然家族做鐘錶起家，但係到佢呢一代已經涉足好多唔同行業，其中手機零件生意就做咗廿年，同唔少韓國嘅大集團都有合作。Bob仲身兼「香港——韓國商貿合作圓桌會議」主席，佢話已接任呢個職務三年，原本雙邊發展勢頭唔錯，但係近年因為韓國部署薩德導彈防禦系統，令中韓關係生變，連帶香港同韓國嘅交流亦受到影響。
不過Bob好樂觀，認為正因為雙方官方接觸減少，令商界有更大嘅發揮空間，以確保民間保持良好嘅關係及交流，仲話最緊要做到生意喎。