政情：陳淑莊 一舊雲 另闢高鐵戰線死(舌累)冇人理

要求參觀高鐵站 又想討論「三步走」

立法會鐵路事宜小組尋日召開本年度首次會議，會議開首就選主席同副主席，結果由議員田北辰同陳恒鑌自動當選，分別擔任主席同副主席。跟住陳淑莊就話希望能夠爭取議員參觀高鐵西九龍站，而參觀應經由秘書處邀請，並由官員陪同出席同講解，強調重要議題應要有記錄，而黃碧雲亦認同相關建議，仲話要參觀埋月台、香港同內地口岸區等，因為將來啟用後就去唔到嘞，又話近期有報道披露站內嘅平面圖，但係議員從未見過相關資料，希望政府可以提供。

老實講，港鐵早前已邀請咗立法會議員、區議會及唔同嘅團體參觀高鐵西九龍站，港鐵同政府官員都多次好言相勸叫非建制派去睇吓，但非建制派偏偏杯葛，正所謂蘇州過後冇艇搭，依家又舊調重彈，仲死(舌累)要跟佢哋嘅方法去參觀，試問邊有人再騷佢哋吖！

一舊雲之後仲要求小組討論高鐵西九龍站落實一地兩檢方案嘅「三步走」方式，因港府即將同內地討論高鐵運作。同場有非建制議員認為下次會議先討論高鐵事宜或太遲，因全國人大常委會或喺十二月通過一地兩檢方案。

舊調重彈想再拖 畀人睇穿冇位入

為咗阻撓政府提出嘅高鐵西九龍站實施一地兩檢方案無約束力議案，非建制派用盡辦法「拉布」阻撓，朱凱廸喺上周三立法會大會時仲出怪招，動用《議事規則》動議不中止二讀有關法案，無喇喇又拉咗八粒鐘，依家一舊雲要求喺鐵路小組討論一地兩檢方案嘅「三步走」方式，擺明係想另闢戰線再拖喇！

非建制派想「炸爆」一地兩檢方案，點知自爆，畀人睇穿晒。事關陳恒鑌就話立法會曾就高鐵事宜喺八月份召開聯合會議，加上鐵路事宜小組應集中工程，認為涉及政策範疇應交由其他委員會跟進。換言之，即係唔會畀位非建制上囉！