中環出更：新花名「醬爆」 陸頌雄想去拍片
唔少政客都會被改花名，而唔少花名都同演藝界有關，好似立法會議員蔣麗芸就被叫「元秋」，而議員陸頌雄亦有同樣遭遇，被網民起朵叫「醬爆」，但佢就話呢個花名唔係負面，仲話將來想嘗試扮醬爆去拍片添！唔通佢想由議員變演員？
麥美娟：拉布影響去廁所時間
醬爆係藝人周星馳經典電影中嘅角色，陸頌雄話自己係周星馳粉絲，而且覺得呢個角色夠正面同積極，難怪佢唔介意呢個花名，仲話將來會嘗試扮番醬爆去拍片，聽落又幾有噱頭喎。而議員麥美娟就透露，以往唔知邊個係醬爆，但睇完相片後都認同陸頌雄有幾分相似喎，睇嚟有啲欣賞呢個花名啵！
另外，立法會現時復會約一個月，但拉布戰已經展開，而建制派目前採取一小時集體休息一次以減少點人數機會。麥美娟就透露，拉布期間連去廁所都要計過數先得，好似早前會議廳只得三十六人，咁啱佢同蔣麗芸都有需要去廁所，為咗避免人數不足而被泛民要求點人數，所以都要排住隊離開咁話。但陸頌雄就大嘆，拉布已經常態，議會無拉布先係新聞，搞到有街坊誤會拉布已經有改善，難怪建制派要咁着緊修改《議事規則》喇！
卓妮