對於有近視、遠視、散光嘅人嚟講，眼鏡真係好重要，萬一唔見咗眼鏡就如同人生絕望一樣。醫學界立法會議員陳沛然（Pierre）前晚踢波後發現遺失眼鏡，咁啱尋日朝早就要到台灣醫院授課，冇時間畀佢重配眼鏡。難怪佢要喺社交網站大呻︰「今翅（次）真的大鑊鳥（了）」。

Pierre喺社交網站話，自己喺踢足球時換上隱形眼鏡，完場後就發現眼鏡不翼而飛。唔少Pierre嘅朋友紛紛留言關心，有朋友建議佢戴隱形眼鏡出埠，亦有人話佢點可以只得一副眼鏡。Pierre就話，自己戴隱形眼鏡會感到不適，所以只會喺踢足球時先戴隱形眼鏡。

Pierre又話，自己有約五百度近視同百幾度散光，因技術問題未能做到矯正散光，平時就算戴隱形眼鏡都會受散光影響，睇唔清電腦螢幕上嘅字，所以好彩佢仲有副運動款式眼鏡。不過着住正經西裝嘅佢戴上運動眼鏡後，同平日喺立法會內嘅斯文形象大有出入，甚至仲有啲似卡通人物，難怪佢自己都話覺得尷尬。睇嚟經過呢次教訓，Pierre都會配多副後備眼鏡以防萬一喇。

卓妮