政情：西九問題鑊鑊甘 搵陳智思啃爛攤子
西九文化區風波不斷，除咗原本兩百幾億元嘅撥款唔夠用嚟起全部工程，仲要諗計撲水，近日又爆出新聘請嘅表演藝術總監，惹來多年來推動粵劇發展嘅八和會館主席汪明荃（汪阿姐）公開質疑佢唔熟悉戲曲。西九鑊鑊新鮮鑊鑊甘，當日搵嚟運輸及房屋局前常任秘書長栢志高做西九文化區管理局行政總裁，就係想佢去拆彈，但似乎唔係好拆得掂，近日有傳政府屬意行政會議召集人陳智思，接任做九管理局董事局副主席，唔知陳智思啃唔啃得落西九咁大個爛攤子呢？
藝術總監被汪阿姐質疑唔熟戲曲
西九文化區自構思以來就不斷爆鑊，近年最為人關注嘅係二百幾億嘅撥款，因為工程延誤而超支，最終唔夠錢起所有工程，包括音樂劇院及大劇場等核心設施嘅第三期，要另覓「錢途」，外界甚至質疑會唔會爛尾收場。
最近又爆出另一場風波，就係西九嘅發展一向包括多方面不同嘅藝術，層面咁廣泛，要搵一個熟習多樣藝術嘅人士嚟做藝術總監的確唔容易，如果人選唔適合，自然有機會只會側重發展個別藝術範疇，對西九整體發展絕非好事，近日西九文化區管理局就聘請外籍人士方美昂（Ms Alison Friedman）做藝術總監，就令一直關注西九文化區內戲曲中心發展嘅汪阿姐大為質疑，更加指西九管理層曾承諾業界將為戲曲設獨立藝術總監。
西九爆鑊全部都咁甘，近日又傳出可能即將會有高層人士變動，西九管理局董事局副主席夏佳理即將夠期，有指政府屬意搵陳智思接手做呢個位。咁樣聽落，唔係一個新鮮嘅名字，睇嚟今屆政府都係鬧人才荒，先會不斷翻叮舊人做唔同嘅公職，連陳智思本身已經做緊行會召集人，都要被搵出嚟做多樣。不過，講真嗰句，西九醜聞爆不停，呢個爛攤子仲布滿地雷，陳智思隨時被炸到飛起呀！