政情：大閘蟹宴搞唔成 象哥轉食長腳蟹？
依家應該係大閘蟹嘅黃金檔期，但由於舊年內地大閘蟹發生二噁英事件，至今供港批文仍未批，加上日前台灣大閘蟹又被驗出二噁英超標，搞到每年均會舉辦大閘蟹宴嘅立法會進出口界議員黃定光（象哥）亦只能攤開雙手，無奈因無大閘蟹供應而要取消蟹宴。
嗜蟹如命嘅象哥話，鑑於舊年內地蟹含二噁英導致滯銷，今年輪到台灣蟹出事，因此唔少供應商都唔敢入貨，而內地蟹又未有批文，所以目前幾乎冇大閘蟹供港。咁咪要取消蟹宴？象哥笑言或以長腳蟹取代大閘蟹搞蟹宴，又指長腳蟹多肉，或者更受歡迎添！
最鍾意都係紅蟹
不過，象哥就話自己最鍾意食嘅都係潮州凍蟹所用嘅紅蟹，指紅蟹肉多且味道鮮甜，身兼香港中華總商會會董嘅佢仲話，會建議中總嘅會所今年用紅蟹取代大閘蟹酬賓。