政情：公民講場：研撤限奶令 陳肇始隨時孭鑊

針對水貨客搶購奶粉再轉售而推出嘅限奶令實施已有四年，施政報告就提出要檢討限奶令，話因為依家奶粉供應穩定，所以係檢討嘅時機，仲唔排除取消限奶令添。話口未完，尋日已經有多名屬於水貨客重災區嘅北區區議員發起簽名行動，反對取消限奶令，擔心一旦取消限奶令，搶購奶粉嘅情況會重現，搞到啲奶粉再度供不應求。依家奶粉供應穩定，都係因為有限奶令，明明相安無事，政府反而無事搵事做，係咪得閒得滯呢？如果有乜差錯，睇怕食物及衞生局局長陳肇始隨時要孭鑊。