政情：蘇紹聰「餌」誘 「釣魚」學生醒晒
法律為主題嘅電視劇都有啲市場，但研究法律就係好悶嘅事。香港律師會尋日舉辦講座向中學生介紹《基本法》，周六一早就講法律，唔少學生好快就「釣魚」瞌眼瞓。有見及此，律師會會長蘇紹聰就使出「絕招」，以十部平板電腦作為講座之後嘅網上問答環節獎品，成功令學生「回魂」聽書！
問答環節送平板電腦
蘇紹聰喺活動中負責講解《基本法》，唔少學生不敵睡魔，紛紛低頭「釣魚」。蘇亦深知題目沉悶「趕客」，於是即場展示十部平板電腦嘅照片，話學生喺講座後參加網上問答環節，就可以參加抽獎，雖然喺觀眾席嘅學生未有起哄歡呼，但起身聽書嘅同學仔明顯多咗。
有同學仔問蘇紹聰點解回歸後仍委任外籍人士擔任法官，蘇解釋根據《基本法》，港府委任法官只須考慮專業能力，國籍並非考慮條件。蘇又主動話，香港冇內地來港嘅法官，因為中港兩地司法制度不同，如有內地法官考獲香港奉行嘅普通法專業資格，理論上亦有機會來港擔任法官。