中環出更：林大輝寄望足球魅力 團結社會
香港曾經係遠東足球王國，喺五十至八十年代湧現大量球星，香港體育學院主席、前立法會議員林大輝（大輝）尋日就透過慈善基金舉辦展覽，表揚多位本地足壇傳奇明星，包括黃文偉、張子岱同鍾楚維三名足壇名將。大輝尋日仲話，見到香港社會存在嚴重社會撕裂，認為足球嘅魅力足以團結社會。而幾位球壇名將就寄語年輕人要勤力，仲過橋畀年輕一代球員，要先練技術再練體能咁話。
大輝尋日就話，香港社會存在嚴重社會撕裂，中港兩地矛盾增加，早前更發生球迷噓國歌事件，但佢認為足球嘅魅力可以團結社會，所以希望透過展覽展示香港足球黃金歲月，鼓勵當今社會。
今次獲表揚嘅鍾楚維曾有「亞洲第一中鋒」美譽，佢話自己能夠有衝鋒陷陣嘅能力係因為勤力，以前喺球會集訓前後，都會自己加操，鍛煉個人能力，而佢為人讚嘆嘅頭槌攻門就係咁練番嚟。曾經踢過歐洲球隊嘅張子岱就話，華人身形輸蝕，所以必須靠技術搭夠，佢仲提點年輕一代，要先練技術再練體能。至於黃文偉就話，新一代球員太反叛，如果想有傑出成就，就要多啲聽教練話喇。
陳國基：細個有破壞冇建設
同場嘅特首辦主任陳國基話，自己讀書時成日踢波，而且係踢比較冷門嘅後衞，咁細個就練大腳解圍，難怪佢自言最叻「有破壞冇建設」啦。懲教署前署長單日堅就話，以前因為成日猜包剪揼猜輸，所以要守龍門，佢仲呻做守門員好慘，既無份享受入波時嘅掌聲，失波仲要被隊友鬧，真係好惡啃。
立法會議員葛珮帆同陳淑莊（Tanya）原來都係足球迷，不過Tanya認為睇波首要係睇靚仔，又話依家球員同議員一樣，外表包裝都好緊要。至於港足邊個最靚仔？Tanya話「識睇一定睇教練」，仲大讚港足教練金判坤添。
卓妮